قصة نوال و مراد ( الحب الغريب )
مراد كايبغي نوال و حتى هي كاتبغيه. أحلامهم ما كاتحد و بالخصوص نوال. هي حساسة بزاف و هو ما عندوش مع التعبير. مشكلتو مافيهش الهضرة بزاف. نوال كاتحاول تهضرو و تجبد أي موضوع باش مايبقاش ساكت و لكن الغالب الله والو. بعض المرات كتساءل اشنو اللي عاجبها فيه. اليوم اتافقو يمشيو جهة البحر. الدنيا مشمشة و الحال سخون. ما كاين ما يدار ساعة و لا ساعتين اضربهوم ريح البحر و يرجعوا. شحال هادي ما خرجو و ديما وقت ما تاصلات بيه وطلبات منو اخرجها كايكون مشغول. هاد النهار قرر يلبي ليها الطلب ولكن شرط عليها ما يتعطلوش!
فضلو اتمشاو عوض اجلسو فقهوة. الشاطئ عامر واخا سلات العطلة. مرة مرة نوال كاتحاول تشد ليه يدو وتكى على كتفو و كايتهرب:
- مراد، ياك ما حشمت بيك؟
- لا....علاش؟
- شتك وقت ما حطيت يدي عليك كتهرب مني!
- لا... غير ما كانترتاحش الى قاسني شي حد ملي نكون كانتمشى!
- زعما واخا انا خطيبتك!
- أوكي ماشي مشكل، شدي فيدي و تكاي على خاطرك!
- شتك كاتقولها و انت معصب. الى ما عجبكش نشد ليك يديك بلاش ما دير ليا الخاطر! صافي، بناقص!
- اش هاد الهضرة كا تقولي؟
- كيف كاتسمع! ديما كاديرها ليا!
- اش كاندير ليك؟
- كاتبغي تعصبني بالعاني!
- أوف مالك ديما كاتخيلي شي حوايج ما كايناش. عرفتي اش اجيك مليح؟ يالاه نرجعو بحالنا. بناقص من هاد الخرجة!
- ويلي حبيبة! راه غير كانضحك معاك. دغيا تقلقتي؟
مراد ما جاوبش و بقى كيتمشى ساكت. نوال بقات اللور و كاتزرب باش تلحق عليه!
- مراد!!! واش جينا بجوج ولا جيتي بوحدك؟
وقف كايشوف فالبورطابل. بانت ليه واحد الحجرة كبيرة، مشى جيهتها و اجلس كيتسناها.
- أوف عييت! دير ليا فين نجلس. كون ريحنا فالقهوة حسن و لا هاد التسخسيخة!
-انتي اللي بغيتي تمشاي!
هزت عينيها للسماء و بدات كتمنظر...
- الله.... مراد !
-مالك؟
- شوف النجوم كمزينين السماء تقول مصابيح!
- واش كاتحلمي؟ اش من نجوم وحنا فوقت الظهر و الشمس حارقة وجوهنا؟
- مراد شوف شوف دوك الطيور فوق ديك السحابة. هز عينك الله شحال غزالين!
- ما كاتبان لي غير طيرة بقر (les mouettes ) كتطلع و تهبط فوق الماء!
- ياه! امالك أصاحبي؟ خليك رومانسي شوية!
- اش من رومانسي ولا فرنسي! نتي مخرجاني و الحال مطنطن و تقولي ليا الرومانسية! طبت بالشمس و حواجي لصقو عليا من كثرة العرق!
- صافي بلا ما تبقى تقلب على السبة! قول ما كاتبغينيش و سدات مدام!
- آش جاب النجوم و الطيور لعلاقتنا؟ أ للا كانبغيك و كا نموت عليك!
- شتي ها نتا عتارفتي بأنك ماكاتبغينش!
- باش عتارفت و إمتى؟
- عاد دابا قلتيها! انت كاتبغي شي وحدة سميتها للا.
انا اسميتي نوال!
- اوكي غانعاود من الأول! كا نبغيك أللا نوال! صافي قتانعتي؟
- لا هادشي كدوب! انت ماكاتبغينيش!
- واش نمشي نلوح راسي فالبحر باش تقتانعي و تصدقي بلي كانبغيك؟
بدات تبكي:
- لا أ مراد انت تبدلتي! منهار جات ختك من الطاليان ما بقيتش نتا هو نتا. اش قالت ليك عليا؟ اهئ اهئ. ..
- فين عمرها شافتك و لاعرفاتك باش تقول عليك؟
- ما نعرف! امكن وصفتيني ليها، و ما عجبتهاش!
- هاهاهاهاها! إوا هادي زوينة!
- ها للي قلنا! عندي الحق ياك؟
- شوفي آخر مرة غانقولها ليك وتيقي ولا ما تيقيش: والله الى كانبغيك!
- بلى ما تحاول تصالحني و تكدب عليا! قلت ليك تبدلتي هي تبدلتي، و هادشي اللي درتي ماشي ترجليت!
- هي دابا انا ما بقيتش راجل؟ إوا الله إخلفك عليك!!! داخلنا عليك بالله غقولي ليا اشنو درت؟
نوال ما جاوباتش و عطاتها للبكاء!
- ما لك كاتبكي؟ اش وقع؟
- صافي مليت! طلقني!
- اوا حتى نتزوجو بعدا عاد نشوفو الطلاق!
- و باقي زايد فيه! ما بغيتيش تطلقني؟
- تفوو على نهار! اش داني نخرج!!!
- ياك امراد كاتقوليا تفووو! هادا ما سويت عندك فآخر أيامي ياك! دابا وليت أنا اللي مخرجاك بزز.! إوا أسيدي لهلا يحوجك!
- سمحي ليا! قلتها بدون شعور. انا ما جايش نتخاصم! ماباقيش غانهضر باش تهناي!
- لهاد الدرجة عصبتك؟
- صافي سالينا! قلتليك ما تليتش حامل نهضر!
- هي دابا انا وليت كانجبد الصداع على والو ياك؟
مراد وجهو تزنك و ودنيه حمارو و طلعات ليه السخانة و كايحاول ما بديرش شي حاجة اللي يندم عليها.
- ما جاوبتنيش! دابا انا مولات الصداع ياك؟
- لا انا اللي ما مزيانش و ما كنصلاحش و كنجبد الصداع!
- اشنو زعما؟ رديتني برهوشة و باغي تسكتني بهاد جوج كلمات و لا كيفاش؟
- صافي أ نوال سمحي ليا واري داك الراس نبوسو!
- يا سلام! بهاد البساطة، بغيتي تنسيني كل شي!
مراد صبر حتى عيا ومشى كايجري و تلاح فالبحر و خا ماكيعرفش اعوم. نوال شافتو كايغرق و بدات تغوت:
- مراد! مراد! واش كاظن زعما الى غرقتي غانسمح ليك؟ والله لا سامحتك! باش نشوفو شكون اللي معاه الحق أنا و لا نتا!
من حسن الحظ شي بنات كانوا قراب و كايعرفوا يعومو. داروا اللي فجهدهم وقدروا يعتقوه قبل ما يفوت الفوت. بصعوبة قنعوا نوال باش يديروا ليه البوش أبوش حيث هي ما عارفاش و جاتها الغيرة. ملي عرفات ان حياتو فخطر شرطات عليهم ما يقولو والو و ما يبقاوش حداه. وافقوا و ملي كانوا تايحولوا ينفسوه دورات وجها جيهت البحر. فاق مراد و أول حاجة قالها:
-فين انا؟ اشنو وقع؟؟؟
نوال كانت تاتسنا غي هاد الفرصة!
نوال: ياك امراد ياك!!! بغيتي تيتم ولادك و تخليني هجالة؟؟؟ هادي هي كاتبغيني؟
مراد: علاش كدوي راني ما فاهم والو!
نوال: ما فاهم؟ قل تسحليتي التنفس الاصطناعي! عييت ما نفيق فيك حتى جاو هادوك.....
خافت ما بكون فخبارو والو و تولي هي اللي فاضحة القضية! فضلات تجمع الموضوع حسن ما يبقى يسول شكون هاد البنات!
نوال: لا والو غي شي دراري هما اللي عتقوك!
-مراد: صافي دابا تفكرت! غرقت ياك؟؟،،
نوال: ما نعرف! المهم تلاحتي فالماء و شربتي كثر من القياس و فقدتي الوعي و.....
مراد( قاطعها): هي غرقت!
نوال: شتك كاتقولها وانت فرحان! ياكما حسيتي بشي حاجة؟
مراد: شي حاجة بحالاش؟
نوال: لا صافي نسى!
مراد: فينهم هاد الدراري بغيت نشكرهم و نتعرف عليهم؟
نوال: لا صافي! ركبوا فوق ماطرهوم و ديماراو...من قبيلا مشاو!!!
مراد: كاع ما كين ليتراس ديال الروايض!!! فينهم؟
نوال: هاد النوع ديال الماطر ياقي جديد كايمشيو عموديا بحال الهليكوبتر. تقدر تقول كايطيرو داكشي علاش ما خلاو أثر!
مراد: همممم ما كانتش فراسي! قولي آش تانديرو هنا؟ وييييي دابا ذكرت!!! عصبتيني و كنت غانتاحر!
نوال: مازال ما بغيتيش تحشم! هي دابا انا وليت مجرمة؟؟؟ ياك هادشي اللي بغيت تقول! كون ما غوت و ندبت حناكي و ترجيت الناس كراك متي! دابا هادا هو خيري!
مراد مع العيا ما تلاش قادر يهضر و حاول حتى وقف و تم غادي بلا ما يعرف فين. نوال تبعاتو ماللور كتجرجر حيث قهرتها الرملة و ما قادراش تلحقو..
نوال: مراااااااد واش تسناني ولا غانرمي راسي فالبحر؟؟؟ و الله او مايكون راجل اللي يدير ليا البوش ابوش لا فقت! يلاه!!! باش تعرف تفيق بالبنات!
مراد سمعها و وقف حتى وصلات. بدا يشوف فيها بحال الى اول مرة غيعرفها. النظرة ديالو كانت مخيفة و اول مرة نوال كتشوف مراد آخر. خافت و ما بقاتش عارفة آش تقول. فضلات تنازل شوية و تنقص من النكير لا يولي هو اللي مغرقها. بطريقة كلها غنج و دلال دارت بحال الى عضتها شي حاجة فرجلها وبدات تبوحط:
-أاااااا مراااااد حبيبة! مامااااا شي حاجة عضتني فرجلي. ناري السم السم. غانموت أحبيبي و نخليك واعدني ما تخونيش ملي نموت. ياك ما غاتخونيش؟ عارفاك كتبغيني.... اااااااه عتقني
مراد ما بقى عارف واش يكدب ولا يصدق. تحنا تايقلب فرجلها ما لقا تا جرح...
مراد: ما كاين والو؟؟؟؟
نوال: امكن قرصاتني و هربات. خلات فيا السم بنت الحرام و مشات اهئ اهئ اهئ
مراد: شنو هي؟
نوال: ما نعرف! يمكن شي لفعة ولا عقرب ولا شي حشرة ديال البحر
مراد: كاين شي حشرة ديال البحر
نواال: صافي حبيبة ما بقاتش كضرني باقي ما غانموت، ولادنا ما غايتيتموش ونا ما غنوليش هجالة! حبيبي، كجاتك هاد الخرجة؟ زوينة ياك؟ و فيها المغامرات ههههههه. آش بان ليك المرة الجاية ندوزو النهار فشي جبل؟؟؟
مراد: لا بلاش!
نوال: و علاش أحبيبة؟ تما الجو نقي وصحي و تايكونوا الناس بزاف!
مراد: حيث الى تعصبت غنتكركب من الفوق و ما تلقاي ما تجمعي فيا باقي! بغيتي تولي هجالة؟؟؟
نوال: ما سمعنا فالك! يلاه صافي بلاش!
مراد متلاش زاد كلمة شدها من يدها و قال:
- مانعرف آش شادني ليك؟ و ما عرفتش علاش تانبغيك و ماعرفتش فين غايوصلني هاد الحب! زيدي وكان! يالاه نمشيو جيهت الحوت فيا الجوع!
نوال شدات فيدو و تكات على كتفو و مرة مرة تلوح شي بوسة ملي تبان ليها الطريق خاوية
نوال: عارفة راسي حميمقة و ما عندك الا تصبر احبيبة...
مراد: همممممم هههههه
انتهى!
Commentaires
Enregistrer un commentaire